Há mais de umha semana davam começo no bairro de Coia, em Vigo, as obras destinadas à realizaçom do novo projeto do governo municipal de Abel Caballero, para o que está previsto um orçamento de 300.000 euros: colocar numha rotunda o barco Bernardo Alfageme, pesqueiro de inícios de século. A dilapidaçom de tal quantidade de dinheiro público num projeto completamente estéril, e mesmo de duvidoso valor estético, despertou a indignaçom da vizinhança dum bairro que está a sofrer desemprego, despejos, pobreza e outras consequências da crise económica, e que considera mais importante investir em ajudas sociais para as pessoas do que em rotundas.
Assim, vizinhos e vizinhas nom se demorarom em organizar assembleias e passar à açom, paralisando as obras diariamente desde a passada quarta-feira 3 de dezembro. Aliás, convocarom para ontem, sexta-feira dia 12, umha manifestaçom para exigir a Caballero que invista os milheiros de euros do barco nas políticas sociais das que estám a precisar os bairros de Vigo. A mobilizaçom, que foi secundada por centenas de pessoas, percorreu as ruas da cidade desde a Praça de América até a rotunda de Coia sob a legenda "Nom pode ser, o barco na rotunda e as famílias sem comer!". O ato finalizou com a leitura do manifesto. "Eles moram nessa cidade formosa dos grandes cruzeiros, das obras faraónicas, enquanto nós moramos nos bairros, nas ruas, onde os meses som demasiado longos e o dinheiros, igual que os nossos direitos, som sempre escassos", denunciarom, e anunciarom que continuarám impedindo as obras até que o governo municipal manifeste que "o barco ficará no mar, ou à sua beira, e o dinheiro irá destinado a cobrir as necessidades da gente".
Por sua parte, Abel Caballero aproveitou um ato oficial para reiterar que o buque será instalado na rotunda em poucos dias porque "é onde deve estar porque representa a tradiçom e a origem da nossa economia".