O programa consiste nun xantar na Eira da Xoana ás 14.00 h. (cadaquén trae a súa comida) para, de seguido, iniciar un pequeno roteiro de sendeirismo co obxectivo de amosar aos participantes a riqueza natural, cultural e etnográfica do contorno do castro de Remonde e o castelo de Pambre. Ás 17 h., xa no alto do castro, haberá actuacións musicais e de narración oral, e darase a coñecer o proxecto que a Eira da Xoana ten para o castro de Remonde.

O Castro de Remonde é un dos elementos dun importante contorno cultural da Ulloa que permite coñecer as transformacións na cultura e na xeografía galega desde a Idade do Ferro, pasando pola Alta e Baixa Idade Media, ata a sociedade tradicional do século XIX, todo nun territorio pequeno e accesible para todo tipo de públicos.

A actividade é aberta a quen queira participar. Só ten que presentarse na Eira da Xoana (Agolada) este sábado 25 de outubro ás 14.00 h.