Será unha rota circular que partirá ás 10.30 da mañá da Carballeira de Santa Mariña, cun percurso aproximado de 17 km. A realización da andaina permitirá apreciar “in situ”, toda a desfeita e polución que provocaría esta actividade mineira, de extracción de ouro a ceo aberto.
Os participantes poderán comprobar, onde queren facer os buracos xigantescos, para construiren unha planta de tratamento, que ocuparía unha superficie de 30000 m2. Neste lugar, realizaríase a lixiviación do ouro, empregando Cianuro.
Igualmente, camiñando por Aldemunde entre carballos e castañeiros, percorreremos a lago de lodos, que ocuparía unha superficie de 1800000 m2, onde se depositarían, 17 millóns de toneladas de residuos, dos cais 800.000 Tm, son subprodutos tóxicos procedentes do proceso de lixiviación. Tamén poderemos ver, as proxectadas escombreiras, que acollerían 190 millóns de toneladas de entullos. Todo isto, para conseguiren 34 toneladas de ouro que irían para o Canadá,
As fontes, árbores, valados, muíños, xunto co río Lourido, que veremos no decurso do camiño, desaparecerán para sempre, se se levar a cabo a actividade mineira.
A Xunta de Galiza non debe aprobar definitivamente este proxecto (hoxe en día, a empresa continua a traballar nun novo proxecto, depois das manifestacións do Presidente da Xunta no pasado 15 de Outubro, non autorizando o proxecto inicial), que provocaría a destrución deste patrimonio natural, por unha actividade insustentábel e altamente poluente, que ocasionaría o desparecemento da forma de vida dos habitantes, da terra e do río Anllóns. Todo isto, cun brutal impacto socioeconómico na comarca de Bergantiños.
Da Asociación Cultural “Monte da Estrela” de Arteixo e a Plataforma pola defensa de Corcoesto e Bergantiños, animamos a participación nesta camiñada, como un acto máis de denuncia, á pretendida instalación da mina.