1.- Descoñecemos que razón pode levar a Portos de Galiza a prorrogar unha licenza de obra que, de acordo coa información recollida nos distintos medios de comunicación, tiña caducado o 31 de decembro pasado e que conta coa oposición da cidadanía e do propio Concello de Sanxenxo. En efecto, non se pode entender que desde Portos de Galicia se estea a primar o interese particular fronte ao interese xeral, socialmente máis xusto.
2.- A realización da citada obra vai repercutir negativamente no medio ambiente natural da zona, moi especialmente nas praias de O Barco e Panadeira, e na calidade de vida dos veciños e veciñas da zona que non só verán empeorar a calidade das augas polo previsíbel aumento de vertidos, senón que terán que sufrir unha nova ocupación dun espazo público, que lles pertence, para a satisfacción do interese duns poucos.
3.- Unha vez máis, como ocorre noutras zonas da Ría, a administración defende a destrución do medio ambiente e a calidade de vida da cidadanía en beneficio dunha capa social coa que, as máis das veces, comparte intereses particulares. O caso do complexo ENCE-ELNOSA, sen lugar a dúbidas o foco de contaminación máis importante da nosa Ría, é paradigmático neste sentido.
4.- Así as cousas, desde a APDR queremos expresar máis unha vez o noso absoluto apoio á "Plataforma SOS PANADEIRA" nas súas xustas reivindicacións de salvagarda do medio ambiente e do interese xeral, centradas hoxe na oposición á construción de novos pantaláns no porto. Ao tempo, esiximos a paralización cautelar das obras en tanto non haxa unha decisión xudicial ao respecto.
5.- Xa por último, facemos un chamamento á poboación da comarca para asistir o próximo sábado día 25 ás 12 horas á Concentración convocada por SOS PANADEIRA; na APDR estamos convencidos/as de que só coa mobilización da cidadanía seremos quen de conseguir recuperar a Ría para o que ten que ser a súa vocación natural: o traballo do mar, o lecer e o disfrute do conxunto da cidadanía.
Pontevedra 22 de xaneiro de 2014
Foto: Pontevedra Viva