A esquerda independentista, representada por NÓS-Unidade Popular, participou na mesma para dar o seu apoio à histórica luita popular contra esta industria poluinte de enclave imposta polo capitalismo espanhol.
Arredor de um milhar de pessoas estivêrom presentes na marcha que este ano estivo centrada na denúncia da modificaçom da Lei de Costas por parte do governo espanhol do Partido Popular, modificaçom que abre o passo a umha possível ampliaçom da concessom à pasteira para a sua continuidade na enseada de Louriçám por 75 anos mais.
Dúzias de organizaçons e coletivos e pessoas vindas dos diferentes concelhos da Ria de Ponte Vedra e doutras partes do país demonstrárom nesta mobilizaçom que a luita contra ENCE mantém a sua força apesar das campanhas de lavado de imagem da empresa, da sua compra de vontades e do apoio que o Partido Popular lhe brinda em Compostela e Madrid.
No final da marcha, Antia Marinho, em representaçom da APDR deu leitura a um manifesto no que defendeu que a luita polo feche de ENCE e ELNOSA atingirá finalmente os seus frutos.
Antia afirmou que a "mobilizaçom é fundamental para evitar que os interesses económicos de alguns tenham mais força que a justiça meioambiental, a saúde, a lógica e a exploraçom racional dos nossos recursos naturais para acadar um futuro sostível".
