Os contratos que presentan aos propietarios contemplan o pago do 10% á firma do mesmo e o resto a prazo de máis dun ano.
A Plataforma pola Defensa de Corcoesto acusa á empresa mineira de enganar aos veciños indicándolle que a mina xa está autorizada pola Xunta de Galicia e que se non venden o seu monte agora, despois van cobrar moito menos. Estes métodos son unha coacción aos propietarios dos montes e constitúen un proceder que amosa ás claras as intencións desta empresa que desde que chegou a Corcoesto trata con total desprezo aos veciños e aos propietarios dos montes, nos cales, en moitas ocasións entra sen permiso para facer os sondeos.
Desde a plataforma destacan que a empresa mineira está "facendo un esforzo por obter de balde o monte de Corcoesto pagando 600 euros por ferrado" e sinalan que ninguén vende os seus montes a ese prezo posto que xa vale máis a madeira. Por outra banda o monte de Corcoesto é solo rústico de protección forestal que é incompatible coas actividades mineiras extractivas, e no caso de que se autorice o proxecto mineiro ese solo perde esa protección e por tanto equivale a solo urbanizable de uso industrial, que ten un prezo que dista moito do prezo ridículo ofertado pola empresa.
Recórdanlle á empresa mineira que os veciños de Corcoesto e en xeral os propietarios dos montes, non precisan dos seus consellos nin do seu asesoramento sobre os custes das expropiacións, xa que saben ben cales son os seus dereitos e saben como facelos valer. Recordan ademais que como consecuencia do paso dunha liña eléctrica os propietarios dos montes recibiron 1.584 euros ferrado unicamente polo dereito do voo, mantendo a propiedade do monte, e no caso de autorizarse o proxecto mineiro o valor do monte de Corcoesto sería aínda moi superior a este.
Sinalan desde a Plataforma que salvo dous ou tres propietarios, ninguén vendeu o seu monte nin o vai vender. Por outra banda consideran que a proposta da empresa mineira é un insulto á intelixencia porque aínda enriba pretenden facerse co monte pagando a prazos, é dicir, o 10% ao contado e o resto a prazo de máis dun ano. Isto indica que a empresa non ten ningunha garantía de obter autorización da Xunta para a explotación mineira, pero aínda en caso de tela, o proceso acabará nos tribunais xa que o proxecto está sendo tramitado con moitos erros de procedemento e incumpre moitas normas e directivas comunitarias.
Para tratar estes temas do interese dos veciños, a Plataforma ven de solicitar novamente ao Alcalde de Cabana o local social de Corcoesto e confía en que nesta ocasión poida dispor de acceso ao mesmo.
Foto: CC BY Plataforma en Defensa de Corcoesto