O proxecto “Senghasoil”” preséntase coma “unha iniciativa xuvenil nacional” entre cuxos obxectivos figuran “concienciar á poboación da nosa alta dependencia do petróleo explicando as consecuencias desta dependencia; potenciar un desenvolvemento sostible; fomentar a participación e implicación cidadá; mellorar ambiental e socialmente a nosa contorna; ou promover unha maior cohesión social…”. Desenvolverase até o verán do próximo ano, estruturándose en catro liñas principais de traballo: mobilidade e enerxía, alimentación, asociacionismo e residuos.
A presentación pública de “Senghasoil” será hoxe quinta feira 2 de agosto a partir das 21.30 h, na praza da torre de Redondela, nun acto que incluirá pasarrúas, actividades informativas, proxeccións de vídeo e un concerto do grupo “Tridentes”.
Iniciativas en transición en Galicia
A iniciativa redondelá encádrase no movemento de iniciativas en transición. Xurdido en Inglaterra en 2006, espallouse por barrios, vilas e cidades de todo o mundo. No noso país forman xa parte deste movemento as iniciativas USC en transición ou San Pedro en Transición, impulsada nun barrio compostelá e hoxe integrada na Asemblea de barrio creada a raíz do 15M.
Tamén moi vencellada á visión e aos obxectivos deste movemento está a asociación Véspera de Nada, creada para concienciar á sociedade galega do fenómeno do cénit do petróleo. O seu nome procede do refrán galego “Día de moito, véspera de nada”. Esta asociación lanzou a iniciativa Teo sen petróleo, que hoxe semella pouco activa, mais que xa obtivo o logro do recoñecemento oficial do teito do petróleo por parte do concello de Teo.
Segundo se pode ler na wiki en castelán do “Movemento de Transición”, “unha iniciativa de Transición xermola onde dúas ou máis persoas son quen de se expresar, escoitar, informar, e facer algo para reduciren de xeito progresivo o seu consumo de enerxía e materiais. O seu obxectivo será á vez práctico e ético. Práctico, porque aumentarán a resiliencia ou “robustez” das súas vidas, a das súas familias ou as da veciñanza, na perspectiva dos períodos de crecentes carencias que inevitabelmente imos atravesar. Ético, porque tentarán axustar a súa pegada ecolóxica á capacidade do planeta”.
Palestra de Rob Hopkins
Para saberes máis sobre este movemento, recomendámosche a palestra no TED de Rob Hopkins, un dos seus principais animadores: http://www.ted.com/talks/view/lang/pt-br//id/696.
Foto: UCnB
