Em primeiro lugar, devemos indicar que para a APDR –e à espera de que for publicado o texto definitivo da antedita modificaçom da Lei- esta decisom do governo do PP é um importante retrocesso na política de proteçom do litoral e do meio ambiente em geral, umha proteçom que tinha na Lei de Costas umha das melhores garantias. Longe de limitar-se a umha medida de proteçom dos núcleos de populaçom tradicionais, umha medida que temos reivindicado na nossa associaçom, supom de facto um perigoso passo cara à privatizaçom do litoral, à sua urbanizaçom e –em definitiva- à sua destruiçom.

Polo que afeta à situaçom futura do complexo CELULOSAS-ELNOSA, queremos expressar a nossa preocupaçom pola possibilidade que se abre de conceder-lhe umha prórroga de até 75 anos desde o fim da concessom em 2018, por mais que esta prórroga venha condicionada à emissom dum informe favorável por parte da Conselharia de Meio Ambiente da Junta da Galiza. Neste sentido, consideramos que o governo galego –que vem manifestando por ativa e por pasiva a sua posiçom contrária à permanência de ENCE e ELNOSA na Ria- nom pode permitir agora esta inaceitável prórroga.

Em segundo lugar, e à espera de que seja publicado o texto definitivo da antedita modificaçom da Lei e, já que logo, com a precauçom devida ao respeito, a diretiva da APDR vem de tomar as seguintes medidas de carácter imediato:

1º.- Solicitar umha entrevista ao Conselheiro de Meio Ambiente da Junta da Galiza para conhecer de primeira mao a sua posiçom ao respeito da possível prórroga à permanência do complexo ENCE-ELNOSA em Louriçám.

2º.- Convocar umha assembleia aberta a todos os coletivos sociais com implantaçom na comarca (partidos, sindicatos, associaçons vizinais, culturais, ecologistas,…), às instituiçons e às pessoas interessadas em participar a título individual, com o objetivo de pôr em comum a situaçom que se apresenta no litoral da nossa Ria após a modificaçom da Lei.

3º.- Fazer chegar aos organismos europeus com competência no terreno da proteçom do meio ambiente, do litoral costeiro e da qualidade das águas que o circundam, a queixa pola situaçom de desproteçom que vai provocar a aplicaçom desta nova Lei de Costas, requerendo destas autoridades a paralisaçom da modificaçom que nos ocupa e a chamada de atençom aos responsáveis desta agressom meio-ambiental.

Foto: Somos uma Banda - Ria de Ponte Vedra.