A Junta e os governos municipais afetados, em maos do Partido Popular, voltárom a receber umha mensagem clara da populaçom, contra a incineraçom de lixo e contra a instalaçom da central de incineraçom nos concelhos marcados como possíveis alvos da ambientalmente insustentável iniciativa do PP.
Ao meio-dia deste domingo, Lalim registou umha grande manifestaçom que marchou polas ruas do centro, reclamando a reciclagem como alternativa à incineraçom, que as e os manifestantes identificárom com a morte através de um caixom preto carregado durante todo o percurso. "Nem em Deça nem no Irijo" foi a mensagem dirigida nom só ao governo autónomo presidido por Núñez Feijó, como também aos presidentes das cámaras municipais afetadas polo projeto, que mantenhem um vergonhoso silêncio por medo à direçom do Partido Popular, empenhada em impor a incineraçom de lixo.
O Parlamento da Galiza já recebeu umha Iniciativa Legislativa Popular promovida polas populaçons afetadas, e que será debatida apesar da maioria absoluta do PP no Parlamento, que em princípio garante a derrota da proposta da vizinhança contra a incineradora e contra o "modelo Sogama", que leva anos a basear o tratamento do lixo na Galiza através da incineraçom, o que representa umha ameaça permanente à saúde das populaçons próximas das centrais encarregadas de queimar toneladas de lixo. A ILP propom a construçom de centrais de reciclagem que, progressivamente, vaiam reduzindo a incidência da incineraçom até a total desapariçom desse método obsoleto que venhem praticando instituiçons governadas por todos os partidos do sistema.
Foto: Daniel Mexuto.