Segundo os resultados da pesquisa realizada por Filipe Diez nas duas redes sociais informáticas com maior implantaçom no nosso país, Facebook e Twitter, o Diário Liberdade está entre os dez meios publicados na Galiza autonomica (nom se incluem as comarcas administradas por outras comunidades autónomas) mais seguidos.

A classificaçom, que inclue também meios sediados na Galiza mas no idioma do país vizinho e mesmo meios espanhóis com sucursal no nosso país, foi elaborada a 26 de junho, momento em que o Diário Liberdade totalizava 11.306 seguidoras/es em  Twitter e Facebook.

Dentre os meios em galego, o Diário Liberdade é o quarto por penetraçom nas redes sociais, apenas superado por Praza Pública, Sermos Galiza e Galicia Confidencial  - o nosso diário, junto com esses quatro, protagonizou na semana passada um debate em IrmandadeTV. O Galicia Hoxe do grupo El Correo Gallego fica por baixo na classificaçom.

Assim, o Diário Liberdade é o primeiro dos meios de comunicaçom que por enquanto vinhérom desenvolvendo o seu trabalho de forma 100% ativista.

Por cima de parte da media burguesa

Esses números o colocam por cima de meios do regime como El Progreso, La Región, Atlántico Diario e El Ideal Gallego, e muito perto do Diario de Pontevedra e La Opinión de A Coruña, todos eles apoiados pola burguesia e status quo do regime local, 'provincial' e autonómico. Esses dous últimos meios sim som ultrapassados por Praza Pública e Galicia Confidencial.

Apenas as naus almirante da burguesia galega, La Voz de Galicia, Faro de Vigo e El Correo Gallego , além do estrangeiro El País, marcam distâncias importantes nas redes sociais.

A interpretaçom desses dados deve ser, contodo, cuidadosa, pois embora nom se poda falar já em monopólio informativo burguês, sim existe um claro domínio. Dos quatro meios em galego melhor classificados, entre os que está o Diário Liberdade, apenas o Sermos Galiza conta com publicaçom impresa -de caráter semanal-, frente à totalidade dos meios no top 5 do regime -que, além do mais, tenhem frequência diária.

O otimismo tem mais sentido numha projeçom no meio prazo, com clara decadência da imprensa em papel, em transiçom para um modelo digital onde a media alternativa está a colocar umha dura competência, e com faixas etárias jovens em que se dá maior uso das redes sociais.

Quintos no facebook

O Diário Liberdade em particular e a imprensa popular em geral consegue os seus melhores resultados no facebook. Galicia Confidencial e o DL som, respetivamente, o 4º e 5º meio galego com mais penetraçom nessa rede. Apenas La Voz de Galicia, Faro de Vigo e Diario de Pontevedra som quem de ultrapassá-los.

Ranking de médios galegos nas redes sociais (junho 2013) by Filipe Diez