Um singelo programa de software livre chamado RedPhone, descarregado nos “smartphones”, oferece essa encriptaçom, além de gratuidade dos telefonemas.

Que o arredismo seja tam opaco ao Estado espanhol como um campamento de ziganos

O objetivo dos promotores da segurança nas comunicaçons é que os sistemas de cifrado se difundam a centenares ou milhares de galegos e galegas. Dificultar a espionagem policial, que a dia de hoje encontra nas novas tecnologias umha fonte inesgotável de informaçom: redes sociais, correios eletrónicos... e telefones mais fáceis de pinchar que nunca, tanto com ordem judicial como sem ela.

Colocar um entrave a essa transparência, mesmo que seja obrigando-os a gastar recursos económicos e humanos no decifrado de conversas banais entre amigos, é um ganho para qualquer galego que desconfie da polícia.

É seguro RedPhone?

Os promotores do uso de sistemas de segurança nom garantem que o programa RedPhone seja indecifrável polo Estado. Mas decifrar algo já é um custo, de tempo e de dinheiro, e no caso de serem centenares os usuários da aplicaçom, os agentes da Brigada de Informaçom poderiam ver-se desbordados. Em qualquer caso, o suministro fácil de informaçom pessoal e política dos militantes independentistas veria-se mui mermado.

De resto, é claro que sobre qualquer conversaçom telefónica paira o fantasma do “interlocutor silencioso”, de maneira que em todas a chamadas a gente deveria falar pensando que está a escuitar, além da pessoa à que telefonou, um inspector de polícia. Mas como mesmo assim usamos o telemóvel, é melhor procurarmos nom dar grátis ao inspector a informaçom sobre as nossas amizades, atividades quotidianas, opinions,etc.

Quem pode empregar RedPhone?

Parece ser que de momento a aplicaçom só está disponível para os telefones Android, que a podem descarregar gratuitamente na loja do Google. Os outros modelos de telefones “inteligentes” nom podem empregá-la ainda, embora se supom que se está a trabalhar para disponibilizar-lhes umha versom.

Como funciona?

Umha vez se instala a aplicaçom e se regista o próprio número, nom há que fazer nada especial. Quando se faga umha chamada a umha pessoa que também tenha instalado o RedPhone, o telefone oferecerá a possibilidade de chamar de forma segura (via RedPhone) ou de forma insegura (via companhia telefónica).

Os telefonemas via RedPhone som telefonia por IP, isto é, via internet, por isso som gratuitas. A qualidade do som nom é tam boa como a normal (pode haver eco, som entrecortado...), dependendo da cobertura de internet que se tenha.

O telefonema cifra-se de origem a destino, isto é, cifra-se o fluxo de informaçom intermédio, decifrando-se no telefone  recetor.

Serve para os pinchaços policiais legais?

Em teoria a intervençom legal de um telefone pratica-a a polícia entregando o número a intervir à companhia telefónica, que lhe facilitará todo o fluxo de comunicaçom telefónica do usuário. Com o RedPhone os telefonemas nom viajam pola rede telefónica senom por internet, polo que nem sequera constariam como telefonemas (a polícia nom saberia com quem falamos); em qualquer caso, se tivessem acesso ao tráfego de dados de internet, encontrariam-se com umha comunicaçom
cifrada que nom poderiam empregar.

A única opçom para escuitar a chamada seria ter “infectado” o telefone com algum tipo de vírus.