Finalmente nom tivo lugar e foi substituida por umha assembleia virtual os próximos 26 e 27, este fim-de-semana. De Galizalivre falámos com as pessoas que fam parte ativa do projeto, que respondêrom coletivamente as nossas perguntas.
1. Que tal transcorreu a assembleia? Que temas se tratárom? Quantos sócios participárom? Onde se fixo?
Devido a problemas de mobilidade de alguns sócios, finalmente a assembleia foi adiada, mas haverá umha assembleia virtual.
2. Como funciona Chuza! nesta nova etapa, com base associativa em lugar de como projeto pessoal? Qual é o modelo de gestom (quem toma as decisons) e qual o económico (como se pagam as faturas)?
Foi eleita umha junta diretiva da associaçom, que é a que se encarrega dessa área. Quanto às decisons que afetam ao portal, há umha lista técnica (teste de novas funcionalidades, correçom de erros, etc.), e as propostas de mudança de qualquer teor som comentadas previamente na lista de correio dos sócios antes da as implementar.
3. Como avaliades a evoluçom da página? Em que ponto estades?
Chuza nasceu em fevereiro de 2006 (um mês antes do que Twitter, por sinal). Naquela altura a internet era muito diferente a hoje, apesar do (relativamente) pouco tempo que se passou. Havia umha eclosom de blogues, mas nom havia fenómenos similares ao que hoje som as redes sociais maioritárias (Facebook e Twitter, essencialmente).
Nesse tempo a internet mudou e Chuza nom é alheia à dinâmica. Fôrom dúzias, talvez centos os blogues galegos que encerrárom e os seus gestores 'refugiárom-se' no Twitter ou no Facebook. Umha das conseqüências disso é que os blogues deixárom de ser as principais fontes de notícias de Chuza.
O facto de os meios de comunicaçom (quer alternativos, quer os tradicionais) quase monopolizarem os conteúdos tem afastado alguns usuários, defensores de um maior protagonismo dos blogues. Atualmente estamos a analisar como poderíamos paliar isso.
4. Qual é o papel que pensades que tem que cumprir Chuza! no espaço mediático galego? Pensades que o esue tetades conseguindo? Que entraves encontrades?
Para muitos/as de nós, o principal valor de Chuza é o de servir de ponto de encontro. Muitos projetos da rede (e fora dela) tivérom origem primeiro em Chuza, graças aos seus promotores se conhecerem graças a esta rede e trocarem ideias. Chuza é também umha boa forma de estar informado/a da atualidade: quase nom há nada destacável que nom apareça 'chuzado'. Ainda, serve para visibilizar informaçons de notável interesse que passam despercebidas polo 'ruído' que se produz noutras redes sociais, bem como ocultas na imprensa generalista. Chuza é a voz e, ao mesmo tempo, o altifalante da comunidade que a integra, e esse papel continua a ser hoje o mesmo que em 2006.
5. Tedes preparada algumha novidade na página?
A equipa técnica está a trabalhar em diferentes melhoras, algumhas das quais podem ser experimentadas no endereço (http://test.chuza.gl/). Trata-se de aspetos estéticos alguns, outros som funcionalidades ou redistribuiçom de menus.
6. Pensades levar adiante algumha atividade, como Associaçom Cultural, além do mantenemento da página?
O próprio labor de manutençom do website já consome importantes recursos humanos. Para aspirarmos a atividade off-line, que seria muito interessante, antes temos que crescer como associaçom, no mínimo, ao mesmo nível que como comunidade de usuários/as.
