Esta lembrança nom ficará restrita a um simples comunicado fazendo mençom da efeméride, já que Primeira Linha promoverá ao longo deste ano que acaba de iniciar umha série de iniciativas encaminhadas a divulgar a figura de Karl Marx (1818-1883), e sobretodo, para manter presente o vasto legado político e ideológico que deixou à humanidade explorada.
Junto ao seu fiel companheiro Friedrich Engels (1820-1895), Marx pom todas as suas capacidades inteletuais e disposiçom militante ao serviço da luita da classe operária e das suas organizaçons revolucionárias. A partir deles, o socialismo e o comunismo deixam de ser belas e románticas intençons, para se converterem em projeto político da revoluçom mundial.
Desde entom, milhares de trabalhadores/as entregárom o melhor das suas vidas luitando pola transformaçom radical da sociedade e pola revoluçom socialista. Sob a bandeira libertadora, insubmissa e rebelde do marxismo, inumeráveis geraçons de operári@s, camponeses/as, jovens e estudantes enfrentárom com esta potente arma ideológica as ditaduras do capital, militares e polícias, e empresários e banqueiros.
Em tempos de fortes trovoadas provocadas pola atual crise capitalista em curso, a plena vigência do marxismo como método de análise e transformaçom da realidade é inquestionável e diáfana. O marxismo continua a inspirar como um lume sagrado a imaginaçom, os sonhos de emancipaçom e a resistência dos povos que pretendem caminhar com um outro rumo diferente ao que nos conduz par a barbárie e o caos capitalista, em direçom a umha mudança de raíz do mundo, das instituiçons e das subjetividades.
O génio de Marx nom criou do nada todo um sistema de ideias e de interpretaçom da realidade; conseguiu sintetizar na sua altura de forma completa e harmoniosa doutrinas dos representantes mais eminentes da filosofia, da economia política e do socialismo, dando respostas aos principais paradigmas que cada umha delas tinha colocado.
Materialismo histórico e dialética materialista
Marx mostrou à classe oprimida e explorada umha particular maneira de entender o mundo. Porém, nom ficou em mostrar umha mera interpretaçom da realidade e realizou um chamamento decidido à transformaçom da mesma. O marxismo é antes de mais umha filosofia da praxe, e o seu núcleo fundamental é o materialismo histórico e o método dialético.
Nada existe fora da realidade e nada existe se nom existe ao mesmo tempo o seu contrário. Com esta filosofia, Marx combateu o idealismo, a análise de toda questom cinge-se ao realmente existente e nom fica isolada da história, ao estar ligada a umha determinada etapa da mesma. Além do mais, o materialismo dialético mostra como a realidade nom é unilateral e está em constante desenvolvimento, na qual há avanços, retrocessos e, inclusive, estagnamentos.
O revolucionário de Tréveris explicou que o conhecimento social da humanidade (as diversas opinions e doutrinas filosóficas, religiosas, políticas, etc.) reflete o regime económico da sociedade. Depois de ter verificado esta proposiçom, dedicou-se fundamentalmente ao estudo minucioso deste regime económico. Onde os economistas burgueses viam relaçons entre objetos (troca dumhas mercadorias por outras), Marx descobriu relaçons entre pessoas, entre produtores e expropriadores de riqueza. A teoria da mais-valia constitui a pedra angular da teoria económica de Marx, que constata e deixa a descuberto a exploraçom que sofre a classe trabalhadora polo Capital.
A visom global que proporciona o método de análise marxista di que as injustiças de todos os modos de produçom polos quais atravessou a humanidade nom se cingem à mera exploraçom da força de trabalho d@s explorad@s, sendo a opressom e a dominaçom fatores a ter em conta para sustentar e justificar a exploraçom. Tal conclusom é a doutrina da luita de classes, implícita na história universal, base e força motriz de todo o desenvolvimento histórico.
O materialismo histórico e dialético, a teoria da mais-valia, a luita de classes conformam os grandes esteios do marxismo e constituem a base da crítica ao atual estado de cousas. Ao mesmo tempo, indicam ao povo trabalhador a saída da miséria a que nos levou a voragem da crise capitalista.
Relembrar Marx para adaptar e enriquecer o seu legado no presente é tarefa imprescindível para a militáncia comunista da segunda década do século XXI. Divulgar a sua figura ajudará a despertar novas consciências para desafiar a hegemonia do atual sistema que produz miséria, desemprego e embrutecimento moral num momento histórico tam signicativo como o que estamos a viver, quando se estám a ver confirmadas na prática as principais teorias de Marx sobre o desenvolvimento capitalista.
Novas consciências que conhecem a essência da realidade e novos agentes que passam à açom revolucionária para varrer o velho e construir um novo cenário socialista é a forma de tornar realidade os ideais marxistas.
O seu legado e atualidade está mais vigente que nunca. Karl Marx e o marxismo som umha ferramenta imprescindível para a nossa emancipaçom e libertaçom, para o triunfo da Revoluçom Galega.
