1. Mais umha vez, devemos começar por denunciar a atitude represiva das forças policiais espanholas, que intimidárom, ameaçárom e maltratárom militantes independentistas, impedindo a livre expressom e manifestaçom, principalmente na jornada do 24 de julho e apesar da vitória judicial da entidade juvenil da esquerda independentista BRIGA, que obrigou a que se permitisse a sua manifestaçom. Há que destacar que na madrugada de hoje dous membros da nossa Direçom Nacional fôrom retidos e golpeados em Compostela polas forças policiais espanholas quando exerciam o direito à liberdade de expressom.
2. Este 25 de Julho encenou umha nova paisagem no nacionalismo galego, marcada por umha fragmentaçom generalizada em todo o seu espetro ideológico. O que até agora parecia umha caraterística intrínseca do independentismo passou a ser sinal de identidade de todas as restantes “famílias”, daí que se tenham convocado mais manifestaçons e atos políticos que nunca.
3. Dentro do ámbito soberanista e repassando os últimos 12 meses, só NÓS-Unidade Popular mantivo no último ano umha coerente proposta política, inabalável perante o tremor provocado pola ruptura no BNG. As diferentes correntes autoproclamadas soberanistas (FPG, MpB, Causa Galiza) somárom-se à proposta social-democrata de Xosé Manuel Beiras, sem que o incompreensível abandono por parte de Causa Galiza há 10 dias servisse para evitar a sua falência política, representada hoje num autêntico descalabro de assistência.
4. NÓS-UP considera referendada e reforçada a sua estratégia de coerência neste último ano, mantendo o rumo e clarificando diante do povo trabalhador a sua posiçom revolucionária, independentista e feminista. Fruto dessa coerência num contexto de tanto oportunismo político, a esquerda independentista reforçou moderadamente a sua corrente política, o que se viu representado hoje no aumento de participantes na nossa manifestaçom.
5. NÓS-UP quer também agradecer a participaçom de trabalhadores e trabalhadoras, jovens, mulheres e outros setores populares na manifestaçom independentista deste 25 de Julho. Esse apoio servirá para dar mais força ao trabalho da esquerda independentista, o que garante umha linha de aberto confronto com o capitalismo espanhol em defesa de umha saída socialista, independentista e feminista à crise atual. Só o reforçamento do movimento popular com umha orientaçom revolucionária permitirá essa saída. Contribuir para esse reforçamento é o objetivo principal de NÓS-UP na atualdiade.
Nessa direçom continuaremos a trabalhar, como até hoje, sem surpresas nem enganos à base social patriótica e de esquerda à qual se deve a proposta política de NÓS-Unidade Popular.
Galiza, 25 de julho de 2012
Direçom Nacional de NÓS-Unidade Popular
