O proceso criminal acertadamente calificado no noso país por Castelao como "Atila en Galiza" supuxo non só a liquidación física, represión e apresamento de milleiros de militantes revolucionarios operarios/as, labregos/as e intelectuais progresistas e antifascistas, se non unha involución cultural e recrudecemento da dependencia e opresión nacional que sofremos, e que aínda hoxe estamos a pagar.
Deste xeito, a permanencia nas nosas vilas e cidades desta simboloxía non é só un insulto para a memoria antifascista, se non que materializa o significado real da denominada "Transición española", auténtico pacto de elites continuista que reimplantou formalmente a democracia burguesa sen rachar ataduras co réxime anterior.
Os pouco convincentes argumentos do alcalde de Vigo, que apela á resemantización da Cruz como "un monumento a todas as vítimas" (segundo acordo plenario de 1981) e á propia forma do monumento franquista (unha cruz cristiá) sirven de pretexto para o máis descarado negacionismo e falsificación históricos. Os diferentes movementos fascistas escolleron motivos iconográficos novos ou procedentes do imaxinario chovinista de cada estado para marcar indelebelmente o espazo público. A cruz de Vigo, como tantas outras chantadas por toda a xeografía e seguindo o modelo do "Valle de los Caídos" madrileño, pretendía, en palabras do rexime:
"Perpetuar la memoria de los caídos de nuestra gloriosa Cruzada" [...] La dimensión de nuestra Cruzada, los heroicos sacrificios que la Victoria encierra y la trascendencia que ha tenido para el futuro de España esta epopeya, no pueden quedar perpetuados por los sencillos monumentos con los que suelen conmemorarse en villas y ciudades los hechos salientes de nuestra historia y los episodios gloriosos de sus hijos. "
Por moito acordo plenario ou hipotético "consenso" que puidera existir, ninguén no seu san xuízo pode pretender que a memoria das vítimas poida ser honrada mediante un símbolo que, baixo forma da cruz cristiá ou calquera outra, foi edificado co único obxectivo de enxalzar o fascismo. E todo isto, sumado á gravidade de o rexedor situarse nunha posición de pretendida neutralidade onde pesan o mesmo represores e reprimidos/as.
Por todo isto, desde Isca! apoiaremos os diferentes actos promovidos para esixir o derrubamento deste símbolo facista. Porque Vigo non pode permanecer unha xeración máis á sombra da cruz.