Diário Liberdade - Com que objetivos nasce a Plataforma Pró-oficialidade Galega?
Vanessa Martínez - A plataforma nasce com o objetivo de ocupar e achegar-se a outros espaços, de consolidar a seleçom galega como um referente em que se idenfiquem todos e todas as desportistas. Também atingir o maior número possível de oficialidades e consolidar este projeto como sujeito vinculativo entre a sociedade e o desporto galego.
DL - Como pensades atingir esses objetivos? Tendes marcados quaisquer prazos para começar a ver resultados, nem que seja aproximadamente?
VM - Marcar prazos nestes momentos seria um erro. A plataforma nasce com a vontade de atigir objetivos, mas há que ter em conta que partimos de umha base e de um contexto social que nestes momentos nom nos permite marcar esses prazos.
Sim se verám resultados e pequenas vitórias no curto prazo, mas temos claro que isto é umha longa travessia e, portanto, nom podemos procurar resultados tam imediatos ou forçados.
DL - Por que considerades que conseguir essas oficialidades, fazer da seleçom galega um referente para as e os desportistas da Galiza, etc... é tam importante?
VM - Consideramos que o desporto é umha peça mais do puzzle do que poderíamos denominar 'a construçom nacional da Galiza'. Portanto, igual que se trabalha nos ámbitos cultural, social, político ou sindical, também e muito necessário fazermo-lo no desportivo.
DL - Qual a diferença qualitativa que haverá com o trabalho que até agora venhem desenvolvendo Siareir@s Galeg@s?
VM - A diferença estará nos distintos campos de açom duns e doutros. Uns potencializarám mais o trabalho de base, de formaçom e agitaçom, enquanto outros farám um trabalho mais de conscientizaçom, no sentido de ser um agente perante organismos oficiais, de exploraçom de novas vias, de trabalho conjunto com plataformas do mesmo nosso sentir e de contato direto com desportistas.
DL - Como bem explicades, algumhas seleçons "nacionais", como a do Estado espanhol, som usadas como armas em ofensivas de doutrinamento. A Plataforma vai trabalhar na linha de conseguir que as seleçons nacionais galegas nom acabem por ser produtos de consumo massivo, sem qualquer outro valor implícito? Como vai fazer?
VM - A questom nom é ser ou nom ser "armas de doutrinamento", a questom é quem as e os desportistas vam ter como referência, e que camisola aspirarám as e os jovens a vestir.
Evidentemente, na atual situaçom, em que se nega a camisola azul e branca e se impom a rojigualda partimos dum principio de nom igualdade, polo qual a ideia é ir mudando e invertendo cada vez mais essa situaçom.
Sobre a tua questom, gostava de acrescentar que partimos do eixo de nom mercantilizaçom e nom desporto-negócio, e também trabalharemos para mudar isso, achegando-nos e pontencializando outros desportos que nom tenhem estas dinámicas, como é o caso do futebol gaélico.
Outra das mudanças será trabalharmos para que o desporto feminino seja reconhecido tal como o é o masculino, situaçom que atualmente nom se cumpre.
DL - Contades com apoios de desportistas da Galiza? Algum ou algumha delas vos transmitiu o seu desejo de participar internacionalmente com a seleçom galega?
VM - Sim, já se figérom os primeiros contatos e em muitos casos a resposta foi mui positiva, embora, é claro, exista ainda muito medo de "sair do armário". Mas nisso consistirá o nosso trabalho, que mostrem com orgulho a nossa bandeira, camisola... etc. Sem complexos e com dignidade.
DL - Qual a avaliaçom que fazedes da apresentaçom da Plataforma passado dia 11, inserida na jornada do jogo Galiza - Euskal Herria de ráguebi?
VM - Avaliamos muito positivamente a jornada, sobre todo o facto do bom entendimento que existe entre as diferentes plataformas que, com certeza, se materializará em açons e atividades conjuntas.
DL - Para já, quais serám as vossas primeiras açons?
VM - Apos esta primeira apresentaçom da passado 11 de maio, em que tivemos o apoio das outras plataformas, teremos mais umha, desta vez com agentes politicos e desportivos, que tambem servirá para apresentar-nos diante da sociedade.
O trabalho começará com exploraçom de novas vias como pode ser a NF-Board, oficialidades, temas jurídicos e legais, atividades desportivas, palestras e, como nom, campanhas de galeguizaçom das equipas, entre outras.
DL - Obrigad@s!
VM - A vós!