O centro para crianças de 2 a 6 anos, onde se practica a imersom linguística, começou o seu segundo ano com dous grupos de alunos/as, mas ainda há possibilidades de incorporar mais.

O vídeo, intitulado “A Semente que está a agromar”, tem como objectivo pôr caras ao projecto, tanto de maes e pais usuárias do centro como de activistas. Através das suas entrevistas podemos conhecer as razons que figérom surgir a Semente há um ano e as suas características. Ao longo do vídeo observamos também os diferentes espaços deste centro situado no bairro compostelano da Vista Alegre.

A iniciativa Semente parte da associaçom compostelana A Gentalha do Pichel, que se inspirou nas Escolas de Ensino Galego, as escolas das Irmandades da Fala que a começos do século passado funcionávam na Corunha, a iniciativa de Ángelo Casal e Leandro Carré. Um dos seus objectivos é conformar umha rede de escolas no nosso idioma que assegure a pervivéncia do mesmo nas idades mais sensíveis do desenvolvimento linguístico, a segunda etapa do ensino infantil.

Umha pedagogia crítica e respeitosa com os ritmos de aprendizagem das crianças é outro dos sinais de identidade desta escola, assim como a coeducaçom, a laicidade, a interacçom com a natureça e a integraçom no contexto do bairro e da cidade.

No vídeo define-se também a Semente como um centro comunitário, nem publico nem privado, onde todo o benefício que se obtiver reinvirte-se no projecto, e onde existe umha bolsa de solidariedade que o fai accessível a famílias com menos recursos. É comunitário também porque existe umha rede de colaboradores e colaboradoras económicas que sustentam umha parte dos gastos com as suas aportaçons mensais.

Um centro que responde às necessidades dumha comunidade de falantes que cada vez tem mais dificuldades para manter o seu idioma no seu próprio país, e que encontra na Semente um espaço acolhedor, com grandes profissionais, onde se garante o direito das nossas crianças a crescerem em galego.

Fonte Semente