Isso é o que mostra este filme, editado pola Comissom de Defesa da Língua, sob o título Quarta-feira Logo Vem, em relaçom a umha copla que ainda é reconhecida por muitas pessoas que já deixaram de usar estas fórmulas no dia-a-dia. O documentário, de algo mais de 10 minutos, reivindica a recuperaçom das denominaçons tradicionais, que alguns meios de comunicaçom já ensaiárom na última década.

Em primeiro lugar recolhe testemunhos do uso vivo da sexta-feira na Límia Baixa. A seguir viaja ao extremo norte da Galiza, onde as pessoas mais velhas ainda tenhem memória do uso da quarta-feira (que chamavam carta-feira).

A partir daí as gravaçons som realizadas polos membros da Comissom de Defesa da Língua da Gentalha em muitas aldeias da área de Compostela, concretamente para registrar a 4ª, a 5ª e a 6ª feira. O objetivo do filme é mostrar como nestas comarcas as pessoas passárom de quinta-feira a jueves. Só nos últimos anos fôrom introduzidas através do ensino e da televisom umhas novas denominaçons, semelhantes às do castelhano e pouco abonadas no galego tradicional.