No seu escrito, o Foro subliña que a acreditación de residencia na cidade debe ser suficiente para as persoas en situación administrativa irregular poderen acceder a axudas de emerxencia, bolsas de comedor, servizos de asesoramento, bonobuses, servizos de garderia, rendas de solidariedade, etc.  nas mesmas condicións que o resto de residentes e salienta a inexistencia na Coruña de servizos específicos de atención ao colectivo de migrantes (asesoría xurídica, traballo social, axuda na tramitación de documentación, mediación na atención sanitaria e educativa, acceso a vivenda social, capacitación laboral, etc.).

Por outra parte, o documento do Foro fai referencia á necesidade de establecer un control político e cidadán sobre as actuacións –non raro agresivas e ilegais- de axentes da policía local contra o colectivo de inmigrantes, un problema reiteradamente denunciado nos últimos anos por vítimas e asociación de apoio ás persoas migrantes. O foro cita a frecuente extralimitación de axentes nas súas funcións, con detencións de persoas debido á súa situación administrativa (537 na Galiza en 2014 con ingreso en calabouzos policiais por cuestión relacionadas con esa situación), as identificacións e redadas de perfil étnico que, a pesar de prohibidas pola lei, continúan realizándose na Coruña e a existencia de ordenanzas municipais que son utilizadas para castigar o colectivo migrante (sobre taxas por comisos, procura en colectores do lixo, etc.).

Finalmente, o Foro cita o caso da identificación masiva levada a cabo por axentes da Policía Nacional no restauranteMamá África a principios do mes de xullo, coincidindo coa inminencia da partida dun vóo de deportación, unha actuación manifestamente ilegal e sobre a cal entende o Concello da Coruña debería pedir explicacións ao Subdelegado do Goberno.