Os dous trabalhadores, Carlos Ribas e Serafim Rodrigues, participárom num piquete na greve do setor do transporte de mercadorias da província de Ponte Vedra de 2008, greve desenvolvida durante a negociaçom de um novo convénio coletivo e que fora convocada polos sindicatos CIG, UGT e CCOO. Serafim Rodrigues é filiado da CIG e Carlos Ribas da UGT.
No contexto desse conflito fôrom identificados e denunciados pola polícia espanhola. Posteriormente, o Julgado do Penal nº1 de Vigo condenou-nos em 2009 a 3 anos de prisom por um suposto e surrealista "delito contra os direitos dos trabalhadores" (artigo 315.3 do Código Penal espanhol), condena confirmada depois pola Audiência Provincial de Ponte Vedra em 2011. A solicitude de indulto foi denegada em dezembro polo Governo espanhol do PP polo que atualmente os dous trabalhadores e as centrais sindicais estám à espera do resultado de um último recurso e umha nova petiçom de indulto, mas a ordem de entrada em prisom poderia fazer-se efetiva em qualquer momento.
Na conferência de imprensa que os trabalhadores represaliados e os sindicatos dêrom hoje anunciou-se a convocatória de umha manifestaçom em solidariedade com o Serafim e o Carlos, manifestaçom que exigirá o seu indulto ao Governo espanhol, que sairá da Praça dos Cavalos de Vigo às 11:30h e na que chamam a participar de maneira massiva ao povo trabalhador viguês e aos movimentos sociais.
Da CIG consideram que esta sentença é política, em palavras do seu secretário comarcal em Vigo tem "carácter ideológico, com a que pretendem criminalizar e reprimir os protestos da classe trabalhadora e que os movimentos sociais e sindicais nom fagamos frente aos cortes".
A repressom no Estado espanhol cresce
O incremento do carácter repressivo do regime monárquico espanhol emanado do franquismo é umha realidade que se está a verificar desde há anos, e que desde o começo da atual crise económica e política no Reino de Espanha começou a atingir camadas sociais mais amplas a medida que a contestaçom social perante as consequências da crise capitalista e as medidas pro-burguesas dos diferentes governos fôrom a mais.
O Estado espanhol está a endurecer a resposta repressiva, por exemplo com as propostas de reforma da Lei de Segurança Cidadá e do Código Penal, e armando até os dentes os corpos repressivos. O objetivo da repressom é claro, evitar que o descontentamento social chegue a transformar-se numha resposta organizada e radical ao sistema a medida que os efeitos da crise capitalista se fagam mais profundos.
E todo isto enquanto os poucos oligarcas e políticos corruptos que algumha vez som condenados por algum dos seus delitos som posteriormente indultados, como sucedeu com o banqueiro Alfredo Saenz, conselheiro delegado do Banco Santander indultado em polo governo do PSOE em 2011 após serem condenado por um delito de acusaçom falsa.