Comunicado de Briga:
BRIGA quer manifestar a nossa imensa satisfaçom polo sucesso de participaçom e grande ambiente reivindicativo da manifestaçom juvenil unitária que por segundo ano consecutivo decorreu em Compostela em 24 de julho. A véspera do Dia da Pátria volveu ser protagonizada por centenas de jovens que ocupárom, pintárom, colárom, berrárom e enchérom a capital do País de reclamaçons patrióticas, socialistas e feministas.
Jovens internacionalistas doutros povos do Estado como Cantabria, Castilla, Euskal Herria ou Països Catalans estivérom presentes durante esta demonstraçom de força da juventude galega, que quer ver Espanha tal e como acabou o ato: ardendo!
AGIR, AMI, Comités, Galiza Nova, Isca!, LEG e Xeira. E por suposto BRIGA, conseguimos pola segunda ocasiom consecutiva mostrar que a unidade entendida como espaço de convivência, fraternidade e mestiçagem políticas, como ámbito de interlocuçom e açom conjuntas sobre critérios avançados que ofereçam alternativas à brutal miséria da juventude do País, é possível e funcional. Desafia integralmente o quadro de exploraçom que padecemos. Além de contribuir para superar atávicos estigmas que gorárom historicamente a capacidade de mobilizaçom e penetraçom social das organizaçons da esquerda nacional soberanista e independentista.
Em base à boa acolhida da manifestaçom unitária, e frente ao frustrante presente e os desafios imediatos que nos colocam Espanha, o Capital e o Patriarcado, BRIGA quer apostar na visibilizaçom do conflito nacional em que todas as entidades, militantes, colaboradores/as e simpatizantes nos jogamos muito. As nossas próprias vidas e a sobrevivência da nossa naçom.
A responsabilidade política exige pois muito de nós. Jogamos contra inimigos muito maiores e despiadados, mas limitados para combater a vitalidade, a energia e a vocaçom dumha maré de juventude que tam só pode perder as suas cadeias. Assim, e com a força do orgulho nacional como afirmaçom de vontade de ser, apelamos a toda essa massa juvenil a continuar os 365 dias a construir mais Galiza, a destruir mais Espanha. A exibir as nossas cores com paixom, e a luitar incansavelmente utilizando e aperfeiçoando as ferramentas organizativas existentes.
ORGANIZA-TE E LUITA!
VIVA GALIZA CEIVE, SOCIALISTA E FEMINISTA!
VIVA A JUVENTUDE GALEGA EM LUITA!
Comunicado de Isca!:
Isca! estivo presente, por noveno ano consecutivo, nas mobilizacións polo Día da Patria galega baixo a palabra de orde “para gañarmos o futuro, República Galega” porque, como xa dixemos na campaña previa que realizamos, entendemos que unha República Galega soberana, unha independencia total, é unha ferramenta imprecindíbel, é condición necesaria que permitirá guiar o noso futuro e transformar radicalmente a realidade. É pois a soberanía e a independencia a vía de saída do capitalismo e o único camiño para a construción dunha alternativa sistémica diferente, deixando atrás opresións de todo tipo, onde os dereitos sociais estean garantidos e non poidan ser mercadoría das que unha minoría extraia lucro. Efectivamente a mera proclamación dunha República de noso non supón por si mesmo un cambio de sistema socioeconómico mais é unha necesidade imprescindíbel se queremos dispor de condicións reais para facelo.
A mocidade sumando esforzos
Baixo estas premisas mobilizámonos o día 24 de Xullo na manifestación xuvenil unitaria pola independencia que viña a repetir a exitosa, novidosa e histórica cita para a mocidade do pasado ano onde até un total de 8 organizacións xuvenís e estudantís organizadas no ámbito do soberanismo marchabamos xuntas cun obxectivo común: manter viva a Galiza. Malia as presións policiais, malia as identificacións, malia o estado de sitio centos de mozas galegas marchamos pola zona vella de Compostela, encabezados por unha xigante estreleira, reivindicando unha ruptura co Estado Español para termos un futuro digno na nosa terra, pola superación do sistema capitalista inherentemente corrupto que nos domina e non sermos explotados por unha minoría oligárquica, pola abolición do patriarcado para rematar coa opresión e o feminicidio e outras moitas cuestións das que a mocidade tamén é protagonista como esixir a fin da represión, a dispersión e o respeto aos dereitos humanos para coas presas políticas.
De Isca! parabenizámonos colectivamente polo éxito da mobilización un ano máis, así como do grande traballo desenvolto en diferentes comarcas nas semanas previas con manifestacións, accións simbólicas e traballo conxunto de todas as organizacións para sacar adiante unha convocatoria destas características. Consideramos que a mobilización foi de novo un éxito tanto en participación na mesma como en consolidación dun marco xuvenil soberanista e unitario no cal apostamos desde o primeiro día e onde nos comprometemos a seguir traballando de xeito sinceiro e leal sumando esforzos por unha Galiza soberana, socialista e antipatriarcal, que vai máis alá dunha simple mistura de siglas e é un paso máis adiante no movemento nacional e popular de liberación.