Perante a impossibilidade de contar com umha manifestaçom unitária do conjunto das organizaçons independentistas e nacionalistas, tal como 27 de maio NÓS-UP solicitou por carta às forças patrióticas galegas, a organizaçom política de massas do MLNG opta por convocar por quarto ano consecutivo em solitário.

A focagem política da manifestaçom incide na necessidade de "umha esquerda independentista vigorosa e ativa, com firmeza estratégica e flexibilidade tática" para "construirmos com o nosso povo umha alternativa política integral para o presente".

NÓS-UP descarta reformar a Constituiçom de 1978, pois "nom queremos umha Espanha federal, nem umha república espanhola, queremos umha República Galega: umha república de caráter socialista e feminista, ao exclusivo serviço do povo trabalhador galego". Para a Unidade Popular "esta é a única alternativa genuinamente revolucionária e rupturista. A única que os poderes fáticos do Ibex 35 nom toleram nem permitem, porque nom se pode integrar nem domesticar".

Três propostas concretas

O avanço na Galiza do espanholismo em geral, e da esquerda espanholista em particular, exige medidas excepcionais por parte das organizaçons galegas. Neste Dia da Pátria NÓS-UP vai defender a urgência de articular um pólo patriótico rupturista como primeiro passo para frear as falsas alternativas do chauvinismo de esquerda espanhol, e injetar ilusom e entusiasmo no corpo social do nacionalismo e do independentismo.

Em segundo lugar a criaçom de candidaturas de unidade popular para as eleiçons municipais da vindoura primavera com um programa soberanista, de esquerda e feminista, sem ceder no princípio de auto-organizaçom. Atingir estes objetivos permitirá iniciar um processo de reflexom, diálogo e debate sem límites entre as organizaçons nacionalistas e independentistas, aberta à incorporaçom ativa e abrangente de centenares de pessoas sem adscriçom partidária, ativas nos movimentos sociais, que deve cristalizar com a refundaçom da esquerda pariótica.

Ato político e jantar popular

A manifestaçom finalizará na praça do Toural onde decorrerá a partir das 13.30 horas um ato político com a intervençom de Rebeca Bravo, porta-voz nacional da Unidade Popular.

Posteriormente, a partir das 15 horas, terá lugar um jantar de confraternizaçom mo parque de Belvis.