Vai passar, em parte, devido à pressom da Junta da Galiza e do empresariado galego, com vistas a fazer negócio e também com o intuito de aproveitar mais umha ocasiom para fazer prosselitismo espanholista.

Nada tem a ver a intencionalidade real de trazer essa 'Vuelta a España' ao território galego com a escusa que a Junta de Feijó costuma esgrimir cada vez que trai à Comunidade Autónoma da Galiza algum dos insofríveis circos pretensamente desportivos "Made in Spain" (estimular os desportistas de base, potencializar o desporto, etc)

A Junta da Galiza esbanja o dinheiro do povo galego para trazer as seleçons desportivas espanholas e para atrair eventos desportivos de elite, mas veta as seleçons galegas, deixa que os clubes desportivos galegos desapareçam, esquece o fomento da prática de atividade física saludável na populaçom e o desporto de base... excesso de circo (para isso nom há austeridade) e nada de pam.

Sobram autos de fé patriótica espanhola com cheirume ressesso e falta um ordenamento jurídico progressista que permita, por exemplo, umha lei de federaçons desportivas que obrigue a separar o desporto de elite profissionalizado do desporto de base, o que ajudaria a salvaguardar os interesses do segundo e, por seu turno, impediria que as administraçons públicas seguissem desviando dinheiro público para o desporto de elite, escudando-se no fomento do desporto de base. Claro que isto é pedir de mais ao proto-fascismo bourbónico.

NÓS-Unidade Popular concebe o desporto como um direito do povo e nom como umha ferramenta de doutrinamento ideológico nem como um negócio.

Além disso, queremos salientar o facto de que, mais umha vez, a 'Vuelta' passa por cenários de valor ambiental tais como o miradoiro do Éçaro ou a serra dos Ancares. A concentraçom de viaturas, gente acampada, cenários com dúzias de milhares de vátios de potência em luz e som, etc, nessas paragens nom é umha prática que podamos qualificar de respeitosa com os espaços naturais nem com as espécies que neles habitam. Gerarám-se toneladas de lixo e dificultará-se a cria de várias espécies de aves e aumentará o risco de que se produzam incêndios florestais durante e após a passagem da 'Vuelta'. Isso, só para citar alguns efeitos letais derivados da nefasta decisom de fazer passar essa corrida ciclista por esses lugares.

Nom queremos 'Vuelta Ciclista a España' na Galiza e chamamos ao seu boicote, a protestar ativamente contra a celebraçom de etapas da 'Vuelta' na Galiza.

Galiza nom é Espanha!

Direçom Nacional de NÓS-Unidade Popular

Galiza, 24 de Agosto de 2012