Com organizaçom da Associaçom Juvenil Meçá desde 2008, o Outono em Boal faz sete anos. Um pequeno festival que tenciona despertar mentes e propor alternativas à cultura institucional. Um dos princípios do festival é a reivindicaçom do galego na comarca, que atualmente vê os seus direitos lingüísticos totalmente ignorados polas autoridades asturianas, que administram esta comarca galega. Aliás, há também no festival umha sensibilidade com o idioma do país vizinho.
Estám confirmadas as bandas musicais Tuenda e Os Pampirolos de Grandas, ambos da comarca e já participantes em ediçons anteriores do evento. O festival será gratuíto, e sob essa filosofia nos últimos anos já atuaram no palco boalês artistas como Alfredo González, Mapi Quintana, Pepe el Ferreiro, Martxelo Otamendi, Guadi Galego, Pablo Texón, Michael Lee Wolfe, Jacobo de Miguel, Felpeyu, Vallarna, Skainhead e La Tarrancha.
A Associaçom Cultural Meçá vai sortear produtos alimentares e artesania do país, e as pessoas interessadas podem comprar as participaçons nos locais de hostelaria da zona. O festival será fechado com umha ceia popular na noite de dia 6.