Foto - Cineclube Compostela
A sesión escollida para iniciar a programación regular desta 2014-2015 estará formada por catro curtametraxes e mediometraxes de Pier Paolo Pasolini, extraídas de filmes colectivos nos que participou o director italiano: O requeixo (La ricotta, Italia / Francia, 1963), A Terra vista dende a Lúa (La Terra vista dalla Luna, Italia / Francia, 1967), Que son as nubes? (Che cosa sono le nuvole?, Italia, 1968) e A secuencia da flor de papel (La sequenza del fiori di carta, Italia / Francia, 1969). A sesión terá lugar, como en tempadas anteriores, no CS O Pichel (Santa Clara, 21) a partir das 21.30 horas.
O requeixo recolle a posta en escena na campaña romana da paixón de Cristo dirixida por un alter ego de Pasolini interpretado por Orson Welles. A realización desta curtametraxe, realizada para o filme colectivo Ro.Go.Pa.G (no que participan tamén Rossellini, Godard e Ugo Gregoretti), homenaxea o cinema mudo, especialmente coa aceleración das imaxes que remite a certas curtametraxes de Chaplin. Considerada unha das cumes da crítica social de Pasolini, o filme mostra unha sociedade enferma, preocupada pola beleza exterior máis corrupta por dentro, e foi secuestrado por “vilipendio á relixión do estado”.
En 1966, Dino De Laurentis propone a Pasolini participar cun episodio no filme As bruxas, que está a producir con Luchino Visconti, Francesco Rosi, Vittorio De Sica e Mauro Bolognini. O director decide adaptar o seu relato inédito Il buro e la bura e recorrer a Totò e Ninetto Davoli, os protagonistas de Paxariños e paxarracos (1966) para filmar a historia de um pai e un fillo que tras perder a súa dona e nai inician unha busca dun novo referente feminino que a substitúa. Rodada sen guión, apenas cun storyboard, A Terra vista dende a Lúa reflicte, desde a forma dunha fábula surrealista, o grotesco e falso da vida.
Que son as nubes?, episodio do filme Capricho á italiana (con outros episodios dirixidos por Mauro Bolognini, Mario Monicelli, Steno, Pino Zac e Franco Rossi) recolle unha representación de Otelo con marionetas, interpretadas por actores reais. Os monicreques interpretan os papeis shakespearianos, mais detrás do escenario pregúntanse por que fan o que fan. Utilizando o recurso da “representación dentro da representación”, Pasolini fai aquí unha reflexión especialmente amarga e sobre as relacións entre o ser e as apariencias e entre a vida e a morte.
Finalmente, a última e máis curta das pezas que veremos nesta sesión é A secuencia da flor de papel, realizada para o filme colectivoAmor e rabia, no que tamén participaron Godard, Bertolucci, Marco Bellocchio e Carlo Lizzani. Esta peza tenta representar cinematograficamente o tema de Edipo Rei: a culpabilidade da inocencia. O protagonista, Ninetto Davoli, percorre as rúas de Roma ignorando a crueza e a inxustiza do seu tempo.
Nado en Boloña en 1922, Pier Paolo Pasolini é ben coñecido como escritor e como director de cinema. Comezou a escribir poemas con sete anos, e publicou por primeira vez con 19, mentres estudaba na Universidade de Bologna. Recrutado durante a Segunda Guerra Mundial, foi capturado por alemáns, e logo da guerra se incorporou ao Partido Comunista Italiano, do que sería expulsado dous anos despois pola súa aberta homosexualidade.
A súa obra literaria, con títulos como As cinzas de Gramsci ou Escritos Corsario polemiza co marxismo oficial e o catolicismo, ós que chamaba "as dúas igrexas" e aos que reprochaba non entenderen a cultura das súas propias bases proletarias e campesiñas. Como director creou unha especie de segundo neorrealismo explorando os aspectos da vida cotiá, no que destacan filmes como Mamma Roma, Enquisa sobre o amor ou Saló ou os 120 días de Sodoma. En 1975 foi asasinado en Roma.
A cuarta feira que ven, 8 de outubro, o Cineclube de Compostela continuará coa súa programación coa proxección de Quen es, Polly Magoo? (Qui êtes-vous, Polly Magoo, Francia, 1966), un filme satírico do director William Klein que ironiza sobre o mundo da alta costura e os seus excesos.
Os filmes será proxectado en versión orixinal con subtítulos en galego. A entrada é de balde, e pódese adquirir un bono axuda para colaborar co Cineclube. O Cineclube tenta ser unha asociación autoxestionada, polo que para manter o noso funcionamento, propoñemos unha achega económica persoal, cunha cota mensual de 5 euros para traballadoras e de 3 para estudantes e paradas.
PRÓXIMAS PROXECCIÓNS
OUTUBRO 2014
Mércores 1 de outubro ás 21:30 no Pichel
O requeixo
(La ricotta, Pier Paolo Pasolini, Italia / Francia, 1963, 34', VOSG)
A Terra vista dende a Lúa
(La Terra vista dalla Luna, Pier Paolo Pasolini, Italia / Francia, 1967, 30', VOSG)
Que son as nubes?
(Che cosa sono le nuvole?, Pier Paolo Pasolini, Italia, 1968, 20', VOSG)
A secuencia da flor de papel
(La sequenza del fiori di carta, Pier Paolo Pasolini, Italia / Francia, 1969, 10', VOSG)
Mércores 8 de outubro ás 21:30 no Pichel
Quen es, Polly Magoo?
(Qui êtes-vous, Polly Magoo, William Klein, Francia, 1966, 102', VOSG)
Mércores 15 de outubro ás 21:30 no Pichel
A rapaza non pode evitalo
(The Girl can't Help It, Frank Tashlin, EUA, 1956, 99', VOSG)
Mércores 22 de outubro ás 21:30 no Pichel
Marilyn cinco veces
(Marilyn Times Five, Bruce Conner, EUA, 1973, 14', VO)
Superstar: A historia de Karen Carpenter
(Superstar: The Karen Carpenter Story, Todd Haynes, EUA, 1988, 43', VOSG)
Mércores 29 de outubro ás 21:30 no Pichel
Eu, un home
(I, a Man, Andy Warhol, EUA, 1967, 93', VOSG)
Presentación de A mirada inqueda: As películas de Andy Warhol (2ª parte). Coa presenza de Alberte Pagán.