Ontem mesmo desenvolvia-se umha nova reuniom entre representantes sindicais e direçom da empresa, mas sem que se produzisse nengum avanço. Para as e os trabalhadores qualquer acordo está vinculado em primeiro lugar à readmissom do pessoal despedido e à anulaçom das outras 66 sançons sem emprego e soldo. Isso para além das reivindicaçons de atualizaçom salarial, cobertura de vacantes e jornada laboral que estám na origem do conflito.

A denúncia da falta de apoio institucional estendeu-se ontem da Cámara Municipal à Deputaçom provincial. Segundo informa a CIG, o pessoal em greve concentrou-se na Deputaçom e mesmo chegou a entrar no Paço de Sam Marcos para denunciar o facto de que alguns concelhos governados polo PSOE (o partido do presidente da instituiçom provincial, Gomes Besteiro) estejam colaborando com Urbaser ao permitirem que a empresa utilize os camions destinados a estes concelhos para recolher o lixo deitado nas ruas de Lugo, vulnerando assim o direito de greve. Também voltárom a denunciar perante a Inspeçom de Trabalho a utilizaçom de pessoal alheio ao centro de trabalho de Lugo por parte de Urbaser.

Mobilizaçom solidária

A campanha de mobilizaçons continuará com umha manifestaçom nacional em solidariedade com o pessoal do serviço de recolha do lixo e de limpeza urbana que percorrerá as ruas de Lugo o sábado 5 de abril, com saída do prédio sindical às 12h.