A Caravana Feminista vai-se achegando e já vamos conhecendo o seu percurso, que fará entre dias 5 e 11 de outubro. Antes de o verao terminar conheceremos as distintas atividades que se realizarám na passagem pola Galiza, em que visitará:
- 05/10, tarde: Ferrol
- 06/10, manhá: Sam Sadurninho
- 06/10, tarde: Narom
- 07/10, manhá: Betanços
- 07/10, tarde: Compostela
- 08/10, manhá: Vilar de Bairro
- 08/10, tarde: Alhariz
- 09/10, dia inteiro: Ourense
- 10 e 11/08, dia inteiro: Vigo
Nos seus três primeiros meses de viagem a Caravana Feminista atravessou o Curdistám, a Turquia, a Grecia, Roménia, Bulgária, Kosovo, Sérvia, Bósnia-Herzegovina, Croácia, Austria, Suíça e a França, tendo publicados boletins sobre a viagem desta iniciativa da Marcha Mundial das Mulheres.
Precisamente a Marcha Mundial das Mulheres na Galiza emitiu um comunicado sobre o terrível crimem de Moranha, com motivaçons machistas segundo todos os indícios. Após as concentraçons de rejeitamento deste sábado a MMM na Galiza pede que "toda a sociedade entenda que é a nossa vida e a dos nenos e nenas a que está em perigo. Que nom pertencemos a ninguém. E que nom vamos ficar caladas, que nom toleramos a violência contra as crianças, igual que nom toleramos a violência contra as mulheres".
Primeiras atividades em Ourense
Precisamente, a Coordenadora Local de Ourense preparou dentro do ciclo de actividades VeránEarte impulsionado polos coletivos culturais de base da cidade umha actividade acerca da Caravana Feminista.
Con palavras cruzadas, trocagem de papeis, sementes autóctones, descobrir os países polos quais passa e passará a caravana ou mesmo com umha caravana (de cartom) "fabricada" para a ocasiom as vizinhas e vizinhos de Ourense tivêrom a oportunidade de se achegarem a esta IV Açom Internacional da Marcha Mundial das Mulheres que já prepara novas atividades em Ourense face à chegada no próximo dia 9 de outubro.