Os resultados das presidenciais de 14 de abril na Venezuela que fortalecérom eleitoralmente a burguesia tem provocado a reativaçom da agressom imperialista contra a Revoluçom Bolivariana. Mas também ativado um profundo debate no campo popular e revolucionário perante os desafios, reptos e preocupante situaçom que vive o processo bolivariano.
No recente comunicado emitido polo Secretariado Nacional das FBL a organizaçom socialista e bolivariana clandestina afirma que "é vital que se tenha suficientemente claro que ainda quando se resulte vitorioso nos processos eleitorais futuros e, por tanto, se conserve o governo nos seus diferentes níveis territoriais se pode perder a Revoluçom Bolivariana, pois, um pacto de governabilidade entre os múltiplos factores de poder que coexistem na sociedade venezuelana, especificamente, entre as elites políticas que se disputam o controlo do Estado em funçom da administraçom da sua acaudalada fazenda pública, nom está descartado no devir histórico do processo, fundamentalmente, em virtude de perder este a sua potencialidade socialista a propósito de um abandono por parte dos seus máximos dirigentes dos postulados que originalmente inspiraram a revoluçom".
O documento das FBL lança 4 propostas o conjunto do movimento popular revolucionário venezuelano consistentes na criaçom de um sistema de coordenaçom centralizado para dotá-lo de um plano de açom para a retificaçom da orientaçom da revoluçom bolivariana.
Em segundo lugar a constituiçom e formal nomeaçom de um gabinete revolucionário que resgate em cada umha das correspondentes gestons ministeriais, o espírito crítico, rebelde, contestatário, popular e dinámico que caraterizou à Revoluçom Bolivariana nos seus inícios.
Como terceiro objetivo o combate aberto a todas as políticas governamentais destinadas a favorecer os interesses da burguesia e do capital trasnacional e apoio a todos os conflitos sociais que se desenvolvem atualmente, como manifestaçom concreta da luita de classes.
Finalmente a preparaçom e execuçom imediata dumha "Ofensiva Admirável" contra todos os interesses da burguesia e as companhias trasnacionais que promovam e apoiem a injerência e intervençom estrangeira, transformando em objetivo militar os seus vozeiros e representantes.
Polo seu interesse reproduzimos integramente o comunicado das Forças Bolivarianas de Libertaçom, organizaçom político-militar bolivariana e socialista que apoia criticamente o processo em curso.
Para mais informaçom sobre as FBL http://www.cedema.org
AINDA ESTAMOS A TEMPO DE SALVAR A REVOLUÇOM BOLIVARIANA
Nom constitui um exagero afirmar que a Revoluçom Bolivariana enfrenta hoje a sua maior ameaça, pois nos dias por vir definitivamente definirá-se o seu espírito, caráter e continuidade como processo histórico que inicialmente representou para as amplas maiorias do povo venezuelano a esperança de viver em um país decente, seguro, soberano e independente, em fim, numha sociedade produtiva, justa, verdadeiramente democrática e coletivamente feliz.
Nas Forças Bolivarianas de Libertaçom tivo-se sempre cabal entendimento das limitaçons da Revoluçom Bolivariana como processo político que nom questiona a existência do capital; no entanto, também se tivo plena consciência das suas enormes potencialidades para se transformar num autêntico processo de construçom socialista, tida conta das complexas dinámicas políticas, económicas e militares que se figérom presente ao longo do seu desenvolvimento; dali que nunca se duvidou em participar ativamente nas luitas destinadas ao seu defesa e aprofundamento.
Esta contradiçom da Revoluçom Bolivariana, isto é, o seu inicial caráter capitalista por um lado, e o seu potencial desenvolvimento socialista polo outro, vive hoje a sua mais aguda tensom, produto da recuperaçom político-eleitoral dos grupos de oposiçom ao governo nacional e, subsequentemente, em virtude da concreçom na Venezuela do conflito interimperialista que se escenifica atualmente a nível mundial polo controlo hegemónico dos recursos naturais existentes no planeta. Neste sentido, o desenlace desta contradiçom pode significar a derrota definitiva da Revoluçom Bolivariana, a nom ser que urgentemente se reative o Movimento Popular Revolucionário e seja capaz de luitar em funçom de implementar as medidas que garantam a RETIFICAÇOM DA DIRECIONALIDADE DO PROCESSO REVOLUCIONÁRIO, tanto no ámbito da composiçom política do seu comando central, como no plano da sua orientaçom histórica.
Neste contexto, é vital que se tenha suficientemente claro que ainda quando se resulte vitorioso nos processos eleitorais futuros e, por tanto, se conserve o governo nos seus diferentes níveis territoriais se pode perder a Revoluçom Bolivariana, pois, um pacto de governabilidade entre os múltiplos fatores de poder que coexistem na sociedade venezuelana, especificamente, entre as elites políticas que se disputam o controlo do Estado em funçom da administraçom da sua acaudalada fazenda pública, nom está descartado no devir histórico do processo, fundamentalmente, em virtude de perder este a sua potencialidade socialista a propósito de um abandono por parte dos seus máximos dirigentes dos postulados que originalmente inspiraram a revoluçom. Portanto, o determinante aos fins de valorizar se a revoluçom avança ou nom, isto é, se há ou nom abandono dos seus postulados e, consecuencialmente, construçom socialista, estriba em estabelecer a que interesses principalmente beneficia a gestom governamental, para além das retóricas e multimilionárias campanhas publicitárias.
Neste enquadramento situacional, o desafio para o Movimento Popular Revolucionário nesta determinante conjuntura histórica pola que atravessa a Pátria, aparte de se reativar como sujeito protagónico com capacidade para participar e incidir na tomada de decisons que definem o destino imediato do país, se concreta na tarefa de garantir a continuidade da Revoluçom Bolivariana, o qual nom implica suspender ou paralisar as suas luitas orientadas a conquistar ou defender os seus direitos e interesses, já que, assegurar a estabilidade da ordem institucional da República nom está confrontado nem pom em perigo o processo de construçom socialista, polo contrário, quanto mais se avance na aplicaçom de medidas que favoreçam às amplas maiorias populares da naçom, mais estabilidade adquirirám as instituiçons republicanas, toda a vez que ditos setores sociais identificaram-se substancialmente com o curso e gestom do quefazer governamental, no ponto de se converter nos seus principais promotores e defensores. Em síntese, sem o impulso e agudizaçom da luita de classes nom é possível a edificaçom socialista e, somente, nessa dinámica em que as massas populares desencadeiam todas as suas capacidades revolucionárias, é que cobra pertinência a estabilidade das instituiçons como expressom e materializaçom das conquistas atingidas no seu desenvolvimento.
Por esta razom, as luitas em defesa dos interesses do país em frente às pretensons colonialistas das companhias trasnacionais representantes dos velhos e novos impérios presentes na Venezuela; as luitas para combater as posiçons neoliberais do governo nos processos de negociaçom sobre as reservas energéticas e mineiras da naçom; as luitas pola conservaçom e defesa dos ecossistemas; as luitas pola demarcaçom dos territórios dos povos indígenas; as luitas por transparentar a administraçom do erário público; as luitas contra a corrupçom e a ineficiência governamental; as luitas a favor do incremento geral de salários; as luitas a favor da instauraçom e consolidaçom do controlo operário sobre a produçom social; as luitas para melhorar os serviços públicos; as luitas contra a generalizadaimpunidade; as luitas em defesa da liberdade sindical; as luitas contra a desvalorizaçom do Bolívar que empobrece aos trabalhadores e aforristas, e enriquece à burguesia; as luitas contra a vocaçom importadora da burocracia estatal; as luitas em funçom da organizaçom e exercício revolucionário do poder popular; as luitas contra o latifundio e pola independência agroalimentar; em fim, as luitas por verdadeiramente construir neste período histórico o que significa e representa a República Bolivariana de Venezuela, constituem genuínas manifestaçons do conflito de classes, portanto, nom é umha posiçom revolucionária desqualificá-las, condená-las ou reprimí-las. Estes conflitos sociais som, em definitiva, a garantia da continuidade do processo de mudança que empreendeu e liderou o Comandante Chávez, polo que devem ser promovidos e desenvolvidos até as suas últimas consequências, baixo umha correta conduçom política.
Adicionalmente, o panorama nacional adquire maior complexidade e risco a propósito das impugnaçons que interpugerom perante o Tribunal Supremo de Justiça as elites da “oposiçom política ao governo” contra as eleiçons celebradas o passado 14 de abril. Todo indica que serám declaradas improcedentes, o qual, nom significa o esgotamento da referida contradiçom que encarna a revoluçom, nem tampouco um desenlace definitivo da atual conjuntura, dado que a estratégia das elites da oposiçom é recorrer a instáncias internacionais a objeto de justificar e legitimar a intervençom estrangeira, particularmente, dos Estados Unidos de Norteamérica. Em conclusom, os dias que se avezinham anunciam cruentos confrontos nos que se decidirá o espírito, caráter e continuidade da Revoluçom Bolivariana.
Portanto, nestas difíceis horas polas que atravessa a pátria, mas à sua vez, luminosas para o seu devir histórico, as Forças Bolivarianas de Libertaçom responsavelmente PROPONHEM ao conjunto de organizaçons que fam parte do Movimento Popular Revolucionário venezuelano, luitar no imediato em funçom de:
1.- O desenho e estabelecimento de um SISTEMA DE COORDENAÇOM CENTRALIZADO entre o conjunto de organizaçons que fam parte do Movimento Popular Revolucionário, a objeto de assegurar o seu acionar unificado face a um PLANO DE AÇOM PARA A RETIFICAÇOM DA DIRECIONALIDADE DA REVOLUÇOM BOLIVARIANA.
2.- A constituiçom e formal nomeaçom de um GABINETE REVOLUCIONÁRIO que expresse as aspiraçons e anseios do Povo Venezuelano em Luita, ao mesmo tempo em que resgate em cada umha das correspondentes gestons ministeriais, o espírito crítico, rebelde, contestatário, popular e dinámico que caraterizou à Revoluçom Bolivariana nos seus inícios.
3.- O combate aberto a todas as políticas governamentais destinadas a favorecer os interesses da burguesia e do capital trasnacional; por tanto, luitar determinadamente em apoio a todos os conflitos sociais que se desenvolvem atualmente, como manifestaçom concreta da luita de classes.
4.- A preparaçom e execuçom imediata dumha OFENSIVA ADMIRÁVEL contra todos os interesses da burguesia e as companhias trasnacionais que promovam e apoiem a injerência e intervençom estrangeira, em consequência, todos os seus vozeiros, representantes e persoeiros se convertem em objetivo militares.
AINDA HÁ TEMPO DE SALVAR A REVOLUÇOM BOLIVARIANA
SÓ O POVO EM LUITA SALVA A REVOLUÇOM BOLIVARIANA
SEM CONSTRUÇOM SOCIALISTA NOM HÁ ESTABILIDADE INSTITUCIONAL
A CAPITULAÇOM É UMHA TRAIÇOM À PÁTRIA
O IMPULSO DA LUITA DE CLASSES É A GARANTIA DO AVANÇO DA REVOLUÇOM
OS PROMOTORES DA INTERVENÇOM ESTRANGEIRA SOM OBJETIVOS MILITARES
GUERRA A MORTE AO CAPITAL
SOMOS FILHOS DE BOLÍVAR … E BOLÍVAR VIVE
Secretariado Nacional das FBL
Venezuela, maio 2013